Jesô Tompo lehibe

1. Jeso Tompo lehibe
Iraky ny Rainy ;
Nolatsain’ny marobe
Tsy mba nohajainy !

Fiv :
Jeso tia, Jeso tia
Maty voahombo ;
Maty tany Kalvary,
Maty re ny Tompo !

2. Ory loatra fahizay,
Zanak’ondry mora ;
Maty mba ho solonay
Sady voakora !

3. Nalahelo, be nanjo,
Nefa tsy nanota
Fa nijaly sitrapo
Tany Golgota !

4. Jeso no Mpamonjy tia
Nahafoy ny ainy
Mba hamory ‘zay mania
Hody amin-dRainy !

 

---

Jeso Vatolampinay

1. Jeso Vatolampinay !
O! arovy izahay,
Ka ny fonay mba sasao,
Manafaha anay izao,
Mba tsy hisy izay hanjo
Olon-tsy mahitsy fo.

2. Tsy ny asa izay atao
Mahatò ny didinao ;
Tsy ny hazotoam-po
No mahazo manadio ;
Tsy ny ranomasonay
No mahafa-trosa anay.

3. Tsinontsinona izahay,
Sady be ny helokay ;
Ry Mpiaro lehibe,
Jeso Tompo ! Mamonje,
Fa miankina aminao
Izahay mpanomponao.

4. Tomoera aminay
Raha ho faty izahay,
Ary raha hiakatra ao
Mba hiseho aminao,
Jeso Vatolampinay !
O ! arovy izahay.

 

---

Jesosy no Mpiandry ny fiangonanay

1.Jesosy no Mpiandry
Ny fiangonanay;
Ny feon’Izy irery
No feo fantatray.
Ka tsy mba vala maro
Ny fiangonanay;
Iray tsy hay zaraina,
Tapahin-Tompo iray.

2. Iray no vatolampy
‘Zay iorenanay,
Iray no Fehizoro
‘Zay ikambananay,
Iray no Mofon’aina
fihinanay ety,
Iray no antenaina
Ho azonay ary.

3.Tabain’ny hevi-diso
Kanefa mbola iray;
Ny saina tsy mitovy
Tsy mahazara anay;
Fisoko maromaro,
Kanefa vala iray;
Ny Tompo no mpiaro
Ny fiangonanay.

4. Ny teny samihafa,
Ny fomba tsy miray,
Tsy misy maharava
Ny fikambananay,
Ny fanenjehana aza
Vao mainka mampiray
Sy mahatsara laza
Ny fiangonanay.

5. Ry Jeso! Hatanjaho
Ny fiangonanao.
Ny fony halalaho
Mba hitoeranao;
Izay firaisan-tsaina
Miseho hatrety,
Velomy hanana aina
Hitohy hatrary.

 

---